Paalam po, Kapok!
Noong Oktubre 25, 2022, alas-dos ng hapon, idinaos ang pamamaalam sa mahigit 100 na taon na puno ng Kapok. Ito ay sumaksi sa mga kaganapan sa loob ng Unibersidad ng Pilipinas sa Los Baños, Laguna. Pinupuri ang tayog at ganda ng pagsaboy nito tuwing mamumulak ang puno. Nagsilbi rin ito bilang silong sa tag-init at tumulong sa maayos na pag-agos ng tubig tuwing umuulan.
Dinaluhan ng mga guro, estudyante, trabahador at mga kaibigan ang pinangalanang programa na “Isang Pagpupugay kay Kapok”. Mayroong mga nagbigay ng mensahe ng pasasalamat, pamamaalam, at pakikidalamhati, kasabay ng mga handog na awitin, sayaw, at tula. Gayundin ang mga pintang iginuhit ng mga pili na sining manlilikha.
Photo credit to the owner
Tila nakikiiyak ang kalangitaan sa tuluyang pagputol sa matandang puno ng Kapok na tumayo sa tapat ng Physical Sciences Building. Tuwing sasapit ang Enero at Pebrero nagsisimula sa pagbunga ng mga bulaklak ang matandang puno. Nabubuo naman ang bunga sa pagpatak ng Marso at Abril. Sa tulong ng mga paniki sa gabi tuluyang nagbubukas ang mga bunga. Ito ang nagiging sanhi ng paglipad ng bulaklak sabay sa hangin na parang niyebe.
Marami ang nasisiyahan tuwing sasapit ang pamumukadkad ng matandang puno. Ngunit may ilan na nagrereklamo dahil sa may sakit sila na hika. Meron din iba na nagpapaliwanag tungkol sa paglilinis nila ng mga aircon o ‘di kaya naman sa paglalaba. Ngunit kuwento ito sa pagkakaloob na buhay ng kalikasan sa kalikasan.
Tinamaan ng kidlat ang matandang puno ng Kapok. Walang malinaw na palatandaan, tanging ang eksperto ang nakapagpatunay dahil sa unti-unting paglagas ng dahon at hindi na namunga ang puno. Natuyo na ang sanga na dati ay dapuan ng ibon at masagana. Kaya sinimulan na itong dapuan ng insekto at niyapos ng mga parasito.
Photo credit to the owner
Hindi na ligtas na manatili pa na nakatayo ang patay na matandang puno ng Kapok. Kaya naman Oktubre 26, 2022 paglagpas ng tanghali, sinimulan na ang unti-unti na pagputol sa matandang puno. Mayroong mga naniniwala na gamot ang ugat at balat nito. May mga nagsasabi rin na maaring makagawa ng langis sa pamamagitan ng buto ng puno. Pinaniniwalaan naman ng mga maya, na ang puno ng Kapok ay nasa gitna ng mundo.
Photo credit to the owner
Narito ang ibinahagi na tula ng isang manunulat at makata na si Omelikhaya para sa “Isang Pagpupugay kay Kapok”.
LOLO KAPOK
Ni Omelikhaya
Punong kapok sa Pamantasan
Maraming salamat sa
mga taong
ika’y nagbigay
lilim at saya
Mga dahon mong
kulay luntian
may nais iparating
sa bawat guro, mag-aaral
at mga bisita
paglawak ng
puso’t isipan
ay kayang marating
kung may tiyaga at
pagpapakumbaba
Maraming salamat
sa panahon na ang
iyong mga bunga
ay bumubuka
lumalabas ang mga
bulak at lumilipad
tila baga mga niyebe
nagyeyelo na ba
dito sa Laguna?
tanong ng iba
may iba naman napapabahing
subalit ang marami
ay namamangha,
napapatigil
at tila ba
may hinuhuli sa hangin
kahit na tag-araw
at ang buong paligid
ay kulay berde
Dahil sa katawan
mong matatayog
at mga sangang mayayabong
Nagagawi ang mga
ayaw magpatalbog!
Posing sa harap!
Posing sa gilid!
Nagpalitrato na
ang ‘di mabilang
na mga mangingibig
Ngayo’y natutuyo na
at natutuklap
ang ‘yong mga balat
tanda ng mga
emosyon at
maraming pinagdaanan
‘di namin batid
ang paglipas
ng mga taon
dahil nandyan
ka naman
‘di natitinag
sa kahit na
anong panahon
Yun pala nais mo
nang magpaalam
sa pamayanang naging
bahagi ka ng kanilang buhay
pasasalamat
pabaon namin sayo
sa patuloy mong paglalakbay
masayang naramdaman namin
ang ‘yong pagkalinga
nawa’y maibahagi namin
ang mga magagandang
karanasan at alaala
sa mga bagong
isko, iska, ate at kuya
ang inspirasyon nitong dala
maging gabay nawa nila
sa pagbuo ng pamayanang
mas mapaghilom at maginhawa
Hanggang sa muling pagkikita…
mano po, Lolo Kapok!
